Noereh birra

Noereh lea bellodatpolitihkalaččat sorjjasmeahttun nuoraidorganisašuvdna mas ulbmil lea fállat sámenuoraide oadjebas deaivvadanbáikkiid, ovdamearkka dihtii min riikačoahkkimiin mii lágiduvvo juohke jagi. Min nubbi doaibma lea leahkit okta oktasaš sáhkaguoddi nuorra sápmelaččaide Norgga bealde.

Noereh álggahuvvui Romssas čakčat 2009:s ja lea das rájes oassálastán máŋggat arenaiguin. Mii leat leamaš mielde lágidit Sápmi Pride, oassálastán olu dehálaš servvodatgažaldagaiguin areálagáržžidemiid ja ruoná kolonialisma dáfus, searvan sámi festiválain nu movt Márkomeannu, Riddu Riđđu, ja eará guoskevaš dáhpáhusain. Dasa lassin lea Noereh ovddasvástádus jahkásaččat lágidit Gáktebeaivvi riikkaidgaskasaččat. Olu min bárggus ii leat seamma oidnosis buohkaide. Mii oassálastit maid čoahkkimiidda ja ovttasbargguide eará organisašuvnnain, ja addit iežamet oaiviliid prošeavttain ja panelasagastallamiin – na, šaddá ge hui guhkki dát listu muhto leat lihká dehálaš barggut sámenuoraide ja ieš organisašuvdnii, nu movt min miellahtuid miela mielde galgá leat.

Jus Noereh galggašii nagodit joatkkit dáid doaimmaiguin, de mii álo dárbbašat miellahtuid ja doarjjamiellahtuid. Mii árvvusatnit buohkaid geat leat oassin ja mielde leamašan hábmet min organisašuvnna. Jus dus lea miella searvat Noerehis, de sáhtát gulaskuddat ovtta báikkálašsearvvis mii soaitá leat du lahkosis: Oslove Noereh (oslove@noereh.no), Romssa Noereh (romssa@noereh.no) ja Ávjovárri Noereh (avjovarri@noereh.no). Maŋemuš searvi guoská sis-Finnmárkku guvlui, ja das ii lea otná beaivvis jođiheaddji dahje doaimma. Jus dus leaš miella fas álggahit dán searvvi váldde áinnas oktavuođa guovddášstivrrain.

Mii eat gáibit ahte fertet eaiggádit gávtti, máhttit sámegiela, dahje ahte fertet leat váibmil oassálastit politihkalaččat. Buot sámi nuorat gaskal 12 ja 30 jagi boaris leat váimmolaččat bures boahtin. Jus leat olggobeale min jahkerájáid, muhto lihká áiggot veahkehit, de váldit mii maid vuostá doarjjamiellahtuid.

Jus háliidat čálihit sisa miellahttun dahje doarjjamiellahttun, de deavddát juogo skovi ovdasiiddus dahje álkibut Vippsa čađa. Don fertet máksit miellahtumávssu juohke jagi jus áiggot jotkkolaččat leamen miellahtu. Jus leat searvan dán jagáš Noereh riikačoahkkimis, de leat juo máksán miellahttuvuođa ovddas.